Jónas Tryggvason 1916–1983

Jónas var fæddur í Finnstungu í Blöndudal 9. febrúar 1916, vann við bústörf með foreldrum sínum og systkinum á æskuárunum en fór á unglingsárunum til borgarinnar að nema orgelleik en hvarf frá því vegna sjóndepru og fór að læra og síðan að stunda burstagerð og bólstrun dívana er fram í sótti. Hann flutti ofan frá Finnstungu haustið 1948 með Jóni bróður sínum og fjölskyldu hans í nýbyggt hús þeirra í Ártúnum og fékk þar rýmri aðstöðu fyrir iðnað sinn.
Tvílyft hús að Húnabraut 26 á Blönduósi byggði Jónas sér, flutti   MEIRA ↲

Jónas var fæddur í Finnstungu í Blöndudal 9. febrúar 1916, vann við bústörf með foreldrum sínum og systkinum á æskuárunum en fór á unglingsárunum til borgarinnar að nema orgelleik en hvarf frá því vegna sjóndepru og fór að læra og síðan að stunda burstagerð og bólstrun dívana er fram í sótti. Hann flutti ofan frá Finnstungu haustið 1948 með Jóni bróður sínum og fjölskyldu hans í nýbyggt hús þeirra í Ártúnum og fékk þar rýmri aðstöðu fyrir iðnað sinn.
Tvílyft hús að Húnabraut 26 á Blönduósi byggði Jónas sér, flutti þangað haustið 1959 og bjó í því til æviloka. Hann tók fljótt mikinn þátt í félagsmálum, fór að syngja með Karlakór Bólstaðarhlíðarhrepps þegar hann hafði aldur til, stjórnaði honum síðar í 7 ár og samdi lög fyrir kórinn og söngbræður sína þar. Sönghóp karla úr Lionsklúbbi Blönduóss æfði hann um árabil, kenndi söng við barnaskólann og spilaði við helgiathafnir á Héraðshælinu. Hann var brautryðjandi við stofnun Tónlistarfélags Austur-Húnvetninga og gjaldkeri og umsjónarmaður við tónlistarskóla héraðsins meðan kraftar hans entust.
Jónas kvæntist 3. maí 1962 Þorbjörgu Bergþórsdóttur frá Fljótstungu. Hún var kennari við Barnaskólann á Blönduósi og áhugamaður um félags- og menningarmál eins og maður hennar.    ↑ MINNA