Þormóður Eiríksson í Gvendareyjum (f. um 1668–d. um 1741)

Þormóður var sonur hjónanna Eiríks Sigurðssonar og Bergljótar Jónsdóttur í Langadal á Skógarströnd. Þormóður var um tíma búðsetumaður undir Jökli og þrjú ár sýnist hann hafa búið í Vaðstakksey og fór um skeið með hreppstjórn á Skógarströnd. Síðast bjó hann í Gvendareyjum og er jafnan við þær kenndur. Þormóður fékkst nokkuð við lækningar og var talinn fjölkunnugur og kraftaskáld. Fyrri kona Þormóðar var Guðrún Árnadóttir og áttu þau tvö börn. Guðrún mun hafa dáið stuttu eftir að þau fluttu í Gvendareyjar. Síðari kona hans   MEIRA ↲

Þormóður var sonur hjónanna Eiríks Sigurðssonar og Bergljótar Jónsdóttur í Langadal á Skógarströnd. Þormóður var um tíma búðsetumaður undir Jökli og þrjú ár sýnist hann hafa búið í Vaðstakksey og fór um skeið með hreppstjórn á Skógarströnd. Síðast bjó hann í Gvendareyjum og er jafnan við þær kenndur. Þormóður fékkst nokkuð við lækningar og var talinn fjölkunnugur og kraftaskáld. Fyrri kona Þormóðar var Guðrún Árnadóttir og áttu þau tvö börn. Guðrún mun hafa dáið stuttu eftir að þau fluttu í Gvendareyjar. Síðari kona hans var Brynhildur Jónsdóttir frá Sellóni og áttu þau að minnsta kosti fjögur börn.
   Þó nokkuð er varðveitt af lausavísum eftir Þormóð og erindum úr kvæðum. Er talsvert af þeim kveðskap prentað í Söguþáttum Gísla Konráðssonar, Reykjavík 1915–1920. Eftir hann eru og varðveittar Rímur af Illuga Tagldarbana í handritum, ellefu að tölu, (óprentaðar) og Ríma af hrakningi Guðbrands Jónssonar (113 erindi) sem segir frá hrakningi Guðbrands Jónssonar í Skoreyjum yfir þveran Breiðafjörð til Barðastrandar 1715. 
   Miklar sögur fóru af galdrakunnáttu Þormóðar og gengu af honum ýmsar þjóðsögur. Hefur Gísli Konráðsson skrifað rækilegast um það í Söguþáttum sínum.
    (Helstu heimildir: Gísli Konráðsson: Söguþættir eptir Gísla Konráðsson. Jón Þorkelsson bjó undir prentun. Reykjavík 1915–1920; PEÓl: Íslenzkar æviskrár, V. bindi, bls. 189–190; Finnur Sigmundsson: Rímnatal I–II, Reykjavík 1966; Íslenzkt skáldatal m–ö. Hannes Pétursson og Helgi Sæmundsson sáu um útgáfuna. Reykjavík 1976).
   ↑ MINNA