Hermann Pálsson 1926–2011

Stefán Hermann hét hann fullu nafni, fæddur 26. maí í Sauðanesi á Ásum og alinn upp í stórum systkinahópi, nam íslensku og kenndi síðar við Edinborgarháskóla. Hann átti glæstan fræðimannsferil en afrækti þó ekki alveg hina fornu íþrótt skáldanna, sjá bækur Hermanns: Söngvar frá Suðureyjum 1955 og Þjóðvísur og þýðingar 1958.
Handrit að síðustu bók hans, Atviksorð í þátíð, kom í ljós eftir dauða Hermanns sem lést af slysförum. Þau ljóð sverja sig í ætt við fyrri kveðskap hans og grunnstefin ekki ósvipuð, rammíslensk en gjarnan tengd „útlegð“ höfundar og fjarlægð frá ættlandi og átthögum. Fróðlegt er að skyggnast inn í hugskot hins merka fræðaþular sem ýtir frá sér gömlum textum um sinn. Það er þyngri straumur og persónulegri tónn í þessari bók en hinum fyrri segir útgefandi bókarinnar.