Sigfús Guðmundsson d. 1597

Sigfús var fæddur á Svalbarðsströnd, talinn bróðir séra Ólafs Guðmundssonar sálmaskálds í Sauðanesi. Kona Sigfúsar hét Guðrún Einarsdóttir og meðal barna þeirra var séra Magnús prestur og skáld á Höskuldsstöðum. Sigfús hefur verið nokkru eldri en Ólafur bróðir hans þar sem hann er orðinn prestur á Stað (Þóroddsstöðum) í Kinn árið 1554 og virðist þá kominn með fjölskyldu. Því kalli hélt hann svo til dauðadags. Sigfús virðist hafa verið heldur fátækur alla tíð. Eftir hann eru prentuð sex kvæði í Vísnabók Guðbrands 1612 og sést á   MEIRA ↲

Sigfús var fæddur á Svalbarðsströnd, talinn bróðir séra Ólafs Guðmundssonar sálmaskálds í Sauðanesi. Kona Sigfúsar hét Guðrún Einarsdóttir og meðal barna þeirra var séra Magnús prestur og skáld á Höskuldsstöðum. Sigfús hefur verið nokkru eldri en Ólafur bróðir hans þar sem hann er orðinn prestur á Stað (Þóroddsstöðum) í Kinn árið 1554 og virðist þá kominn með fjölskyldu. Því kalli hélt hann svo til dauðadags. Sigfús virðist hafa verið heldur fátækur alla tíð. Eftir hann eru prentuð sex kvæði í Vísnabók Guðbrands 1612 og sést á þeim að hann hefur verið með betri skáldum á sinni tíð og gagnrýninn á þjóðfélagið. Sigfús orti sjálfur grafskrift sína og er hún ein fyrsta grafskrift í lútherskum sið sem þekkt er. (Sjá einkum: Páll Eggert Ólason: Menn og menntir IV, bls. 83–84 og 533–541; Vísnabók Guðbrands 1612 (útg 2000). Inngangur, bls. xxxiv–xxxv).   ↑ MINNA