Í Glerhallavík

Hefurðu gengið í Glerhallavík?
þar glóa í fjörunni steinar.
Hafaldan sverfur þar bjargsins brík
og byltist um flúðir og hleinar.
Þá vík byggja vættirnar einar.

Drangur og Skriða um víkina vörð
vel og trúlega halda.
Þar rís mín fagra fósturjörð
í fjallinu sínu valda;
hátt yfir hafdjúpið kalda.

Lesirðu úr fjörunni ljósan stein,
leystan úr bergrisans mergi,
mun gæfan þér auðveld, angur og mein
þér ama um dagana hvergi.
Hann er ástgjöf frá álfi og dvergi.