Fólkið á Bægisá

Eftir afskrift af eiginhandarriti.
Hér skulu sett í Boðnar bjór
Bæsár- heiti -svanna:
Jórunn, Ingunn stykkja stór,
Steinunn, Guðrún, Anna.

Guðmundur þar gagnsemd jók,
get eg að búið styðji;
Hallgrímur í harðri brók
og hempu-Jón sá þriðji.

Ekki þykir mér Ingunn mey
ofmjög titla vanda:
hún kallar „ræfils grindar grey“
gripinn alskínanda.

Ekki þykir Stephán stór,
stirðliga mun hann líða:
að hafa sig fyrir húsgangs-jór
handa þér að ríða.
Tvær enar seinni vísurnar fylgja reyndar enum fyrri í handritum, en líklegt er að þær eigi þar ekki við, heldur sé stakar.