Maðurinn og flyðran

Forgefins hafði fiskimann
færinu keipað lengi dags,
þolgæði stöðugt hafði hann,
þó heppnaðist ekki veiðin strax.
(Merk, að biðlundar mest er þörf
mönnum, sem stunda fiskirí,
skólameistara og skyttu störf
skiljast ei heldur undan því.)

Fiskari sagður öngul á
um síðir hreppti vænan drátt,
stóreflis flyðra það var þá,
þau stríddu hvort við annars mátt.
En þegar hún kom undir borð,
örvaði kæti svangan höld,
til hennar þessi talar orð:
„Tönnin skal prófa þig í kvöld“.

Hann velti lengi í huga sér,
hvernig hún yrði bezt tilreidd:
„Helftina steikja hyggst ég mér,
hálf skaltu verða í potti seydd„.
En meðan þetta mikla happ
matbjuggu og átu þankar hans,
færið bilaði, flyðran slapp,
fór hann svo búinn heim til lands.