Reiptog

Tíska og viska togast á
Tísku veitist betur
klæðafá frá toppi að tá
tyggigúmmí étur.

Viska og tíska vega salt
veitir tísku betur
þó hann blási þéttingsfast
þessi snjóavetur.

Þegar næða nöpur él
Norðri hækkar kúfinn
segir tíska, sjúgðu vel
sígarettustúfinn.

Viska hræðist veðragný
vanmátt sinn og galla.
Tíska silkisokkum í
sækir upp til fjalla.

Vítin aldrei varast hún
vitinn skært þó brenni
og dauðinn kalda raunarún
risti á brjóst og enni.

Henni fylgir fjöldinn þó
fús - á leiðarenda.
Er þá fórnin aldrei nóg
á hvað þarf að benda?