Lýðveldisljóð

Lýsi fögur frelsissól
fjallatind og eyjasund
faðmi öll hin byggðu ból
blessað land á þinni grund
veri barni vöggugjöf
veki blóm á dauðra gröf.

Feðratungan forn og snjöll
felld í stuðla ríms og máls
hrein og skær sem haustsins mjöll
hlý sem geislar arinbáls
bergmál seiði úr hamrahlíð
hljómi um fiskimiðin víð.

Hver í sinni stöðu og stétt
styðji lands og þjóðar hag.
Verjum Íslands óðalsrétt
einum huga, nótt sem dag.
Frjáls sé lund og frjáls sé mund
fram á vora hinstu stund.

Saga lands vors öld af öld
arfinn helga geyma skal.
Þó að hylji tímans tjöld
týndar grafir, fallinn val
fáni Íslands, frjáls á stöng
frægður skal í ljóði og söng. 1944