Laxárdalur

Leitar hugur Laxárdals
lundin ama hrindir.
Krýndar birtu sólarsals
sjást þar fagrar myndir.

Mannlíf dalsins mikið var
menn þar festu rætur.
Ortu sína sögu þar
synir lands og dætur.

Upplifun það yrði sönn
ef að maður sæi
rísa úr tímans týndu önn
tuttugu og fjóra bæi.

Veit ég þó að von er smá
viðreisn þá að líta.
Enda er þróun þrungin vá
þræði alla að slíta.

Allt sem var er þrungið þögn
þétt í sporin skefur.
Gleymskan hefur hæstu sögn
hirðir allt og grefur.