Svarfaðardalur

Inni í fjallanna faðmi
finnst varla gustur svalur
þar er blómlega byggðin
broshýr Svarfaðardalur.

Er húmar og hljóðnar inni
horfi´ ég í minningaeldinn.
Fyrir sjónum mér svífa
svarfdælsku mánakveldin.

Dalur í faðmi fjalla
flý ég til kyrrðar þinnar.
Ennþá eru þar margar
Ingveldar fögurkinnar.

Er ævinnar kulna eldar
- og ísar liggja í tröðum -
rekjum við skínandi skikkju
skreytta minningahlöðum.

Aftur mót hugarhimni
hefur sig fjallasalur.
Birtist sem blikandi stjarna
broshýr Svarfaðardalur.