Baldur Eiríksson fimmtugur 23. des. 1960

Um það leyti var, ég veit
vindur steytingskaldur
fæddist teitur sveinn í sveit
sveinn, er heitir Baldur.

Þó að njóla Norðurlands
næði sól að varna
yfir bóli barnungans
brosti jólastjarna.

Krókur beygðist bögum að
birtist hneigðin ríka.
Vísum fleygði, kvæði kvað
– kútur teygðist líka.

Drottinn taldi: – Drengur þaut
dvínaði sjaldan rokið. –
Hálfrar aldar hlaupabraut
hefur Baldur lokið.

Hyllum vér inn horska svein
hátíð er til staðar.
Lyfta ber við leiðarstein
ljúfu keri mjaðar.