Jökulsá á Breiðamerkursandi

Jökla háu fjöllum frá
flytur á að vörum
ólgugrá í úfinn sjá
undan bláum skörum.

Móðan æðir engu stæð
út af flæðum hranna.
Djúpri blæðir íssins æð
undir klæðum fanna.

Út til græðis engu stæð
inn á svæði hranna.
Djúpri blæðir íssins æð
undir klæðum fanna.

Bungan skríður skarasíð
skefur hlíð og dranga.
Sandinn sníður vegavíð
vatnagríður stranga.

Sund og lænur súðavæn
sveimar kænan lága.
Hýr í blænum hlíðin græn
hlær við sænum bláa.

Elfarsund, eg á í lund
óm af fundi þínum
og er bundinn ættargrund
öllum stundum mínum.