Ósamstæðar vísur – gerðar 1946

Einyrkjanna önn og strit
einatt bannar snilli.
Fjáreign manna fyrr en vit
fær því grannans hylli.

Þeir sem dýrka Mammon mest
margir hljóta völdin
ekki þeim sem allra verst
eru syndagjöldin.

Þögn er talin gulls ígildi
gasprið er þó fleirum tamt.
Athugað er ei sem skyldi
að oft er betra að þegja samt.

Þó er gott að tala í tíma
traust ef máli fylgja gögn
en við lífsins gátur glíma
gengur oftast best í þögn.

Ámælið er ýmsum tamt
yfir mörgu klagað.
Þótt mér sé í geði gramt
get ég stundum þagað.

Ekkert breytist aldafar
enn er hugsun mögur.
– ganga um sveitir ginnkeyptar
Gróu-Leitis-sögur.

Þó að málin þyki vönd
þetta yfir fyrnist
ef að fæst í aðra hönd
eitthvað sem þú girnist.

Af því hreina yndið brást
að á leynifundum
sundur greina girnd og ást
gott ei reynist stundum.

Þegar fæ eg fornar myndir
framkallað í huga mér
gægjast með þeim gamlar syndir
– gamanið þá búið er.

Þótt eg eyði ársins hring
æsku fjarri slóðum
horfi eg á Húnaþing
hugaraugum glöðum.