Síldin

Silfurbjarta bárufalda
blikar á í hafrænunni
vaggar bátnum undiralda
upp að sléttri lendingunni.
Hér er allt á ferð og flugi
farin ró og búin hvíldin
nú hafa allir nóg að vinna
nú er komin blessuð síldin.

Síldin fram úr fylgsnum lokkar
fjör til ótal hreystiverka
jafnvel gamlir gigtarskrokkar
gleyma þrautum við að kverka.

Síld er flestra umtalsefni
alls staðar er síldin étin
marga vekur síld af svefni
síld er framar Drottni metin.

Síldin háa hugsjón hvetur
hreyfir strengi í flestum sálum
síldin einatt áhrif vekur
eins og vín á gylltum skálum.

Síld á afl, sem gróða geymir
gamla bæði og unga hvetur
síldin gerir manninn meiri
mikið er, hvað síldin getur.