Eftir óþurrkasumarið

Köld og vot er okkar eyja
en um landsmál þó
annað verra er að segja
allt í grænum sjó.
Óstjórn þessu öllu veldur
ýmsir gefa í skyn.
Það er ofstjórn öllu heldur
ennþá verri en hin,

Undir lögmáls ok er bundin
athöfn manna flest,
líka verða lokuð sundin
landi að vinna best
líkt og sabbats boð og bönnin
bægðu forðum lýð
gott að vinna, öll var unnin
uppfyllt lagasmíð.

Nauðsyn ill er orsök laga,
en að hefta störf
ár og síð og alla daga
engin gerist þörf.
Eins og lög hjá deigum draga
dáð úr andagift
verða störf und verði laga
víða aktaskrift.

Hygg ég frelsi miklu meira
mætti vera hér
lögin bjóði og banni fleira
beint en nauðsyn er.
Þó að öðrum þjóðum helsi
þyki gott og tryggt,
minnumst þess að fyrir frelsi
fyrst var Ísland byggt.