Á Kili 17. júní 1955

Um Kjöl er leið,
sú er kunn og greið
var fræknum lýð
á fyrri tíð.
Þó urðu skil
um alda bil
er hvarf og fal
Hvinverjadal.

Sú fjallaslóð
mun frjálsri þjóð
enn hæfa best
hún heimtar mest.
Vorn þreytir hug
að þræða bug
um fjöll og nes
fram með vöðlum hlés.

Best leið er bein
hér breið og hrein
hájöklum hjá,
mörkuð hnjúkum blá,
að sönnu svöl,
þar samt er völ
á nógum yl
beri nauðsyn til.

Hér við Bláhvera
má byggð vera,
gróðurland gera
gnótt uppskera.
Geðjast gestum það
í þeim góða stað
bjart er heimahlað
þótt hríði að.

Mætast mitt á leið
milli jökla heið
nóttlaus norðurátt
nú og suðrið blátt.
Þessi eyja á
engu síðri þá
leið frá strönd að strönd
enn stærri lönd.