Grátur.

Gaktu hljótt þar sem grátið er -
Guð er þar að opna sér
leið að lokuðu hjarta.
Tárið er þrautanna þakkargjörð,
þar sem það glitrar, er heilög jörð
hátt yfir húminu svarta.

Gaktu hljótt þar sem grátið er.
- Gráturinn sál í eilífð ber,
frá heilögu hafi hann streymir.
Hvar sem að tárin blika á brá,
bjarmar lifandi guðsneistann á,
er sál vor sífellt geymir.

Grátsins mál fer leynt og lágt,
það lyftist ei víða og flýgur ei hátt,
en nær samt til himinhæða.
- Drag skó af fótum og farðu hljótt,
fylltu ei með háreysti grátinna nótt,
því Guð er þar sárin að græða.