Á nýjársdag 1979

Sígur yfir skuggi skímugrár
mót skörum himins rís hið nýja ár
með kólguél og kuldastorm í fangi.
Bitur óttinn herðir hjarta að,
þó hugurinn í myrkri skynji það
um himinvegu hærra sólin gangi.

Ljóssins faðir þökk af hjarta þér
er þytur yls og birtu um jörðu fer
og þýðir ís og snæ úr frera fjöllum.
Veittu frið og réttu hjálparhönd
lát hlýja geisla ylja freðin lönd
færðu blessun börnum þínum öllum.