Til Sigurbjargar Pétursdóttur

Nú brosir vorsins himinn, hár og fagur
og helgar minning, öll þín gengnu spor,
því sérhver lífsins stríðs og starfa dagur
hann stefndi til að skapa líf og vor.
Það vonarglaða vor, sem við öll nutum
og virðingar og blessun, frá þér hlutum.

Þú kæra móðir! Þér við þakkir færum,
þú, sem allra bæta vildir hag.
Já enn í dag því ýmislegt við lærum
af ævi þinnar löngum vinnudag.
Við biðjum Guð að gæta þín og leiða
á göngu þína, frið og hagsæld breiða.