Söfn

Íslenska
Nynorsk
Esperanto

Persónuvernd:

Vefurinn safnar engum upplýsingum um notendur sína. Leturgerðir eru frá Google sem skráir notkun á þeim.
Vefkökur (cookies) eru aðeins notaðar til þess að halda utan um innskráningar þeirra sem annast efnisstjórn.

Elli sækir Grím heim

Fyrsta ljóðlína:Elli gamla fer um Frón
Bragarháttur:Nýhent
Bragarháttur:Nýhent – hringhent
Viðm.ártal:≈ 1900
1.
Elli gamla fer um Frón,
fala marga gripi lætur:
höfuðóra, svikna sjón,
sálarkröm og valta fætur.
2.
Hún hafði fært þeim fram um Nes
firna stóra vörubyrði;
þrammaði’ hún nú og þungan blés
þaðan upp úr Hafnarfirði.
3.
Varpar hún þá á vinstri hlið
vonar-augum sigur-glöðum:
„Skal nú Elli skipta við
skáldið gamla’ á Bessastöðum.“
4.
Það er best að þulur sá
þiggi nesti hærum sínum;
slíkum flestum herrum hjá
hefur lést í drelli mínum.“
5.
Þangað heim hún hróðug gekk,
hafði nægð af varning góðum:
lúa’ og ergi’ í ámu-sekk,
elliglöp í fjórtán skjóðum.
6.
Glaður í skapi Grímur var,
gesti lét í stofu bjóða;
hressing vill hann þægi þar
þyrsta konan göngumóða.
7.
Full hann hellir staupin stór,
stóð þá kelling öll á nálum,
þegar svellur Boðnar bjór
borinn Elli á silfurskálum.
8.
Þeim varð dátt við drykkinn hans,
dönsuðu nú sem allra kærast,
unz á gang hins gamla manns
glímubragur tók að færast.
9.
Kelling hafði áður í
öðru hnénu forna mæði.
Hver vill eiga undir því,
að hann fái gigt í bæði?
10.
Því fór Elli að þrútna kinn,
þótti heldur kárna gaman;
pyngir hún nú i poka sinn
pytlingunum öllum saman.
11.
Kveður hún svo við kaupin slík,
kvaðst þá gamla Elli-tetur
rölta nú inn í Reykjavík,
reyna hvort þar seldist betur.
12.
Seinna þetta sama kvöld
sönglaði’ hún inn með Skerjafirði:
„Kraftur handa heilli öld, –
Hrólfur – tíu skálda virði!“