Söfn

Íslenska
Nynorsk
Esperanto

Persónuvernd:

Vefurinn safnar engum upplýsingum um notendur sína. Leturgerðir eru frá Google sem skráir notkun á þeim.
Vefkökur (cookies) eru aðeins notaðar til þess að halda utan um innskráningar þeirra sem annast efnisstjórn.

Borgarnes

Fyrsta ljóðlína:Röðli mót á rústum fornum
Viðm.ártal:≈ 1925
Flokkur:Afmæliskvæði

Skýringar

Á 50 ára afmæli kauptúnsins, 22. mars 1917
1.
Röðli mót á rústum fornum
rís þú, ungi bær!
Eldist vé frá öldum horfnum,
æskan hjá þeim grær.
Jafnan skal vor hugur háður
helgri rækt við svörð,
þar sem Grímur Úlfsson áður
eldi vígði jörð.
2.
Víst eru búða veggir settir
vel í þessum reit,
þar sem hlér til héraðs réttir
hönd, á móti sveit.
Hollar dísir heillum tengi
héraðsbyggð og sæ,
veiti unga gæfu´ og gengi
Gríms og Egils bæ!
3.
Greiðist vegir, grænki sveitir,
grói, stækki tún!
Heilsi eygló yrktir reitir,
er hún skín frá brún!
Trúum fast á framtíð þína,
fagra héraðsbyggð!
Látum aldrei, aldrei dvína
ást við þig og tryggð.
4.
Brátt, ef ekki bilar trúin,
braut frá dal til hlés
er af vélum eimlest knúin
út í Borgarnes.
Upp um flóann alla daga
eru skip á ferð.
Allt er breytt um hörg og haga.
Höfn við Nesið gerð.
5.
Hugur Gríms hér lifi´ í landi,
lýsi sveit og bæ!
Fylgi djarfur Egils andi
öldufák um sæ!
Nýir hættir nær oss færast,
nálgast tímahvörf.
Enn þarf mörg í landi´ að lærast
list, og trú á störf.
6.
Bærinn vaxi, blómgist, dafni
Brákarpollinn við!
Björg frá sæ og byggðum safni!
Blessist grund og svið!
Komi sól og vor til valda!
Víki nornir hríms!
Signi faðir allra alda
ættleifð Skalla-Gríms!