Göngu-söngur

Göngum drengir! Fótur fót
flytji skjótur yfir grjót,
til þín væna, burt úr bænum,
brekkugræna sveit og fljót.
Skeytum ekki hætis hót
hita’ og svita. Það er bót:
friðar leiðir, fjall og heiði
faðminn breiða okkur mót.

Syngjum drengir! Greikkum gang!
Golan svala kælir fang.
Látum villa’ og trylla tröllin
tóna són á heiða vang!
Fjalla hellusteina stang
stælir hæl á ferðalang.
Syngjum drengir! Greikkum ganginn
Gola svala, kæl þú fang!

Göngum drengir! Sunginn söng
syngja eftir klungur-göng.
Grýtta stytta leið og létta
látum kátan göngusöng!
Engan drunga, drengir! – Löng
duni heiða leið af söng!
Leiðin eyðist, gangan greiðist
gleðikliðinn við af söng.

Beri fána her vor hátt.
Honum lán úr hverri átt
færi blær, og fylgi’, er bylgja
flaggi vaggar kátt og dátt.
Reyni’ á sveina þróttinn þrátt,
þors og máttar tákn þú átt:
eld og kulda’ í feldi falda,
flagg’ið rautt og hvítt og blátt.