Jólanótt (1940)

Kerti loga, gul og græn og blá
- gleðin kemur eins og skip að landi
fullt af því sem allir elska og þrá
- enginn maður vill að skipið strandi.
Laufabrauðið, lítil jólastjarna
lýsir hugskot gamalmenna og barna.

Jesús Kristur kemur hér í nótt
kannski á ösnu, máski á brúnum hesti
Trúuð hjón, sem tala aldrei ljótt
taka á móti hinum þreytta gesti.
Herrann brosir, horfir milt á frúna:
Hann má ekki vera að slóra núna.

Úti í heimi er allt í grænum sjó
- andskotinn þar heilum löndum ræður
Ljóssins fursti finnur aldrei ró
fyrr en allir verða góðir bræður.
Júðans ríki jóla sinna bíður
Jesús Kristur út í myrkrið ríður.