Ferskeytt – skáhent eða skáhenda (fráhent)

Kennistrengur: 4l:[o]-x[x]:4,3,4,3:OAOA

Innrím: 1B,1D;3B,3D

Bragmynd:

Lýsing: Ferskeytt – skáhent er eins og ferskeytt óbreytt að öðru leyti en því að það hefur ekki endarím í frumlínum. Aftur á móti er aðalhendingarím í þeim langsetis þannig að önnur kveða rímar við fjórðu (endarímsliðinn).
Hátturinn er mjög gamall eins og best sést á því að fimmta ríma Sörlarímna er kveðin undir honum en þær rímur hafa verið taldar ortar á seinni hluta 14. aldar. Hátturinn varð þegar algengur rímnaháttur á elsta skeiði rímna. Nafnið á bragarhættinum, skáhent, kemur fyrst fyrir í Háttalykli Halls Magnússonar (d. 1601).
Sveinbjörn Beinsson kallar háttinn Fráhent í Háttatali sínu og fylgir það dæmi síra Helga Sigurðssonar en notar orðið skáhent um sama hátt þar sem sniðrím bindur frumlínurnar saman þversetis. Hins vegar er svo rík hefð meðal rímnaskálda öldum saman fyrir heitinu skáhent um háttinn, eins og hann birtist hér, að óvarlegt þykir að ganga gegn því.
Hátturinn sem Sveinbjörn kallar skáhent er hér nefndur skáhent – frumhent.