Ofdrykkjan (III. hluti)

Þótt „bombum“ sé varpað á brennandi svörð
og borgin sé hvæsandi eldur,
skriðdrekaáras af æði sé gjörð
hver einasti húsveggur felldur,
þá er þó heitasta helvíti á jörð
sú hörmung sem ofdrykkjan veldur.

Því aftur má græða hinn sviðnaða svörð,
og sundraðar borgir má reisa,
en mjög er það hæpið á himni og jörð
frá helvíti ofdrykkju að leysa.
Því ætti hver maður að vanda sinn vörð,
þá válegar freistingar geisa.

– – –

Mun nú komið til manndómskasta;
magnast óðfluga dæmi slík.
Gróðrarstöð alls kyns eymda og lasta
óðfluga virðist Reykjavík.
Vitandi menn af víni óða
vart með orðum ég lýsa kann,
en lagaverndaðan glæpa-gróða
gleypir nú Ríkis-„sprúttsalan“.