Söngvarinn

Hann var eins og geisli frá guðanna stól
sem glitrar í svínanna drafi.
Hans rödd var sem vordagsins vermandi sól
og vindblær frá dimmbláu hafi.
Þar heyrðum við óma in himnesku jól
frá heillandi kvöldroðans trafi.

Hann var eins og geisli frá guðanna stól
sem glitrar í mannanna tárum.
Hver tónn hans varð líkn þeim, sem lifandi kól
og lokaði blæðandi sárum.
Hver hljómur varð fátækum skjöldur og skjól
í skipreika á mannlífsins bárum.

Hans líf var sem vonin er vornóttin ól
í vetrarins gróandi sárum.
Hann var eins og ljómi frá logandi sól
á Ijósvakans fjarlægu bárum.
Hann var eins og geisli frá guðanna stól
sem glitrar í mannanna tárum.