Meðan að ævi mín ei þver

Bæn
Lagið: Um dauðann gef þú drottinn mér.

Meðan að ævi mín ei þver,
miskunnar þinnar leita,
drottinn ég vil af hjarta hér,
hjálpa mér svo að breyta,
eins og hér skilja ætti við
umvendun sanna, náð og frið,
virðstu mér nú að veita.

Andlegum deyð og dofa frá,
drottinn þín náð mig geymi,
því ég ei veit nær enda á
er mín lífstund í heimi,
í lifandi trú að lifa hér,
lífs meðan tími endist mér,
gef þú ég aldrei gleymi.

Drottinn! láttu mitt hjarta hér
við heiminn fast ei vera,
en lyst og krafta auk þú mér
ætíð þinn vilja gjöra.
Gef jafnan hugsi ég heim til þín,
hvar ég fyrir míns Jesú pín
um eilífð vona að vera.