A 20 - Einn lofsöng af Kristó

Þessi sálmur, sem er 6 erindi, er þýðing á sálminum, Herr Christ, der einig Gottes Sohn,  eftir nunnuna Elísabet Cruciger (Kreutziger) (1500–1535). Hún var af aðalsættum (fædd von Merseritz), yfirgaf klaustur sitt gekk til liðs við siðbreytinguna ásamt Katrínu frá Bora (1499–1552), sem síðar varð eiginkona Lúthers. Elísabet giftist prófessor Caspar Kreutziger, rektor háskólans í Wittenberg. Hún orti þennan sálm árið 1523 og er hann talinn elstur lútherskra sálma. Marteinn biskup virðist þýða eftir dönsku þýðingunni, Herr Christ, Gud Faders enbaarne. Þýðing Marteins var ekki tekin upp í síðari sálmabækur. Sálmabók 1589 er með aðra þýðingu, Jesus, Guðs son eingetinn (nr. 17).  Hélst sú þýðing í sálmabókum og messusöngsbókum til loka 18. aldar. Sigurbjörn Einarsson, biskup, endurþýddi sálminn og birtist hann í sálmabókarviðbætinum, Sálmar 2013, Kristur, Guðs sonur sanni.  Hann er í Sálmabók 2022 nr. 64.