Svona er þetta danska dót

Á blómaskeiði íslensks húsgagnaiðnaðar var Trésmiðjan Víðir þekkt fyrirtæki og áberandi í húsgagnaiðnaði. Við endurbætur á gamla Þórskaffi voru keypt innflutt húsgögn frá Danmörku og sýndist þó sitt hverjum um þá ráðabreytni en stuttu eftir að húsið var tekið í notkun eftir endurbæturnar var maður nokkur stór og þrekinn að skemmta sér á staðnum og eftir að hafa dansað nokkuð kröftuglega hlassaði hann sér niður í einn danska stólinn sem lét undan og maðurinn sat á gólfinu í spýtnahrúgunni. Í því að maðurinn bröltir á fætur verður honum að orði:

Svona er þetta danska dót

djöfuls hrákasmíði.

Heldur vil ég hörkuljót

húsgögnin frá Víði.