Guð þér hita veitti og vit

Guð þér hita veitti og vit
vísu og rit að smíða.
Orða og lita logaglit
lof þitt flytur víða.

Ef þjóðin kynni að meta menn
– málm úr leir að velja –
starf þú fengir æðra en
aura í KEA að telja.

Einn ég þekki er ötull gekk
andans brekkur, laus við hrekk.
Man ég ekki í mennta stekk
meiri rekk í skólabekk.

Óráðs laupum lítt hann kraup
lofi og raupi galt ei kaup
fræði saup og herti hlaup
hellti í staup svo út af draup.