Erfiljóð eftir Guðrúnu á Steinsstöðum

Hér hvílir hulið mold
í helgum guðs akri
góðlyndrar grafið hold
Guðrúnar Jónsdóttur
blómi kvendyggða klár
kvaddi heims armæðu
fjörs hafði endað ár
eitt rúmt og sextíu.

Þolinmóð þreyði víst
þungt oft við heilsubann
trúföst á tálar síst
teygja réð náungann
hreinlunduð hér fram braust
hún meðan fjör entist
og setti allt sitt traust
á Drottinn Jesú Krist.

Enduð nú öll er sorg
armæða horfin er
í himna helgu borg
heiðurskórónu ber
sálin því fagnar frí
í faðmi síns lausnara
og syngur unun í
eilíft hósíanna.