Í Vatnahverfi

Er blikar lauf á lyngi
og leikur golan hlý
hér ótalmargir una
sem eiga sumarfrí.
Hér bærast birkihríslur
er blærinn strýkur létt
sem margar hlýjar hendur
hafa gróðursett.

Og sitthvað er á seyði
hér sólardögum á
því hér er ljúft að lifa
er ljóma vötnin blá.
Og hér á ellin athvarf
með æskunni í bland
við golf á grænum völlum
sem geymir þetta land.

Í ágúst blána brekkur
af berjum, sérhvert haust
og hingað börnin hjóla
og hlaupa endalaust.
Og bláir barnamunnar
brosa og hlæja dátt
og allar fötur fylla
í friði, gleði og sátt.

Og Hólmavatnið hýra
er hlýtt í aftansól
þar laugast litlir fætur
í leyni bak við hól.
Þar syndir svanamóðir
og syngur lágri raust
hún fræðir fleyga unga
um ferðina í haust.