Verðmæti lífsins

Þeir sjá ei sólina rísa
er síðla úr bólinu læðast
og fara á mis við fögnuð þann
að finna er hrjóstrin klæðast.

Ei finna þeir fannirnar eyðast
í fjallanna bröttu hlíðum
er tókst ei að vernda vorhug sinn

í vetrarins nöpru hríðum.

Þeir hafna hrífandi krafti
þá heilögu verðmætin græðast
er hjallanum neðsta hörfa frá

og hata að lýjast og mæðast.

En hugsjónir frjálsar og fagrar
fæðast í þeirra hjörtum
er miða áfram að markinu lengst
móti himninum björtum.