Íslensk örnefni

Líti ég á landabréfið
ljóð er mér í hug.
Hreimfögur hrynjandi
hefur mig á flug.
- Gullfoss og Dettifoss og Dynjandi.

Legg ég við mitt óðnæmt eyra
elfar heyri nið.
Fleygist á flúðum
fljót um klettasnið.
- Markarfljót og Skeiðará og Skjálfandi.

Líta vil ég læki hoppa
létt um fjallatá.
Launfagrar ljúfsvalar
lindir vil ég sjá.
- Varmalækur, Laugaból og Lindarsel.

Skyggnist ég um sker og eyjar
skrautlegt veit þar safn.
Söngvar og sagnir
sindra´ um hvert eitt nafn.
- Skrúður og Drangey og Draumasker.

Fýsa mig um sund og sanda
söngljúfustu nöfn.
Tónþýður tvísöngur
töfrar mig í höfn.
- Álftafjörður, Súgandi og Sólheimar.

Hugur hver sem Ísland elskar
unir best við fjöll.
Frostköld og funheit
fegrar hann þau öll.
- Kötlu og Heklu og Helgafell.

Forynjur og furðuverur
festu víða nöfn.
Öræfin íslensku
eru töfrasöfn
- Trölladyngja, Sprengisandur, Surtshellir.

Ei mun bregðast álfatrúnni
útlæg hyggja mín.
Blikandi blysfarir
„bleikur máninn skín“.
- Hulduhvammur, Álfaklettur, Kirkjuhvoll.

Yfirgef ég ævintýrin
ógleymanleg þó.
Ungmenni Íslands
yrkja nýjan skóg.
Hallormsstaðir, Þrastaskógur, Þórsmörk.

Veit ég nýir vermireitir
vernda landsins blóm.
Úrsvölust örnefnin
endurminning tóm.
- Svalbarða og Kaldakinn og Kaldbakur.

Líti ég á landabréfið
leiftrar mér í hug.
Ljómandi litir
lyfta mér á flug.
- Rauðisandur, Grænavatn og Gullteigur.

Lokinhamrar, Lómagnúpur
Lón og Dimmufjöll
Svanshóll og Sæból
seiða þau mig öll. -
- Unaðsdalur, Vonarskarð og Skaldsstaðir.
1932