Samtíningur - á leið til skráningar.

Konráð prófessor Gíslason eignar Stefáni amtmanni Þórarinssyni þessa bögu. Gerð í gamni um Björn bróður hans.
heimskan rík í heila flaut
hér á landi bjó hann.
Kálfur sigldi, kom út naut
kusi lifði og dó hann. SÞ SigHalld/Vísnasafn



Hannes Pálsson frá Undirfelli gat ekki eða vildi ekki verða samferða Jóni Pálmasyni og Friðfinni Ólafssyni í kosningaleiðangri í Húnaþingi, festi hann bíl sinn og ók síðan á eftir hinum. Þá varð eftirfarandi vísa til og sennilega eiga Friðfinnur og Jón báðir þátt í henni:
Áður kallaði ´ann okkur skríl
illur var þessi fundur
nú eltir Hannes okkar bíl
eins og svangur hundur.
Himinn blánar öðrum yfir
alltaf gránar minn
annan smánar allt sem lifir
eltir lánið hinn. Kr. Einarsson og Heiðrekur Guðmundsson
Á fyrstu dögum Vísis gaf Þorsteinn Erlingsson þennan fyrripart til botnunar:
Bravó Ísland, þar kom það
þú hefur Vísi fengið
Þótt hann færi ei stórt af stað
strax mun hækka gengið. Karl Magnússon læknir?
Framsókn ýtir fleyi á mar
fegrar grýtinguna
flibbar hvítir fela þar
fleira en skítmennskuna. Jón Pálmason
Svart á hvítu sýnir Pá
svo ég hlýt að muna:
Furðu nýtinn er hann á
íhalds skítmennskuna. Vald. Benónýsson
Skagfirðingur ljóðaði á Húnvetning:
Ef þú ferð að ögra mér
öxin brátt á háls þinn ríður.
Húnv.: Þó í bili óvíst er
hvor á þann lim er skaðann bíður.
Ung kona frá Ak., er gekk undir nafninu Kleópatra, fluttist til Húsavíkur og setti upp verslunina Elfu við hlið Vald, Hólm Hallstað og var aðeins þunnt þil á milli búðanna. Þá kvað Helgi Hálfdanarson:
Danir kúra í kaldri mold
kóngar fyrri alda.
Kleópatra klædd í hold
komin er til valda.
Vald. Hólm svarar:
Sumir grafa úr gleymsku og mold
girndir fyrri alda.
Kleópatra og hennar hold
hugarangri valda.
HH svarar aftur:
Drottning Nílar unir ein
elfarniði fínum
lét sér nægja hjartahrein
hólm í ósi sínum.
Bjarni Ásgeirsson var að leita að Þorsteini Dalaþingmanni í húskynnum Alþingis og spurði:
Hefurðu séð þrjótinn þann
Þorstein Dalasýslumann
kom ég víða en hvergi fann
karlhelvítisandskotann?
Ragnar Ásgeirsson svaraði:
Ekki blóta, Bjarni minn
bíddu hérna, vinurinn
kannski að hann komi inn
karlhelvítisandskotinn.
Á leið til Þingvalla í þoku:
Ég vil líta björgin blá
búðir Snorra goða
þú skalt víkja, þoka grá
Þingvöll vil ég skoða. Friðrik Hansen
Gamla Skjaldbreið láttu lyft
leiðum þokuslæðum
þær hafa fleiri fagrar skipt
fyrir Hansen klæðum. Karl Friðriksson
Björn Axfjörð kvað um sölumann á Akureyri:
Sá er lipur sölumaður
samviskan ei þjáir hann.
Sig. Halldórsson botnaði:
Viðmótsléttur, lygahraður
laginn að blekkja náungann.
Á einni síðu í safni Sigurðar eru eftirfarandi 5 snjallar vísur og tildrög:
1.
Helga Halldórsdóttir á Dagverðará sendi Helga Hjörvar þessa stöku:
En hvað skemmta ætíð mér
ævintýrin fögur.
Helgi minn, ég þakka þér
þínar góður sögur.

2.
Einhver varpaði fram þeirri spurningu hvort veðurspáin hans Jóns Eyþórssonar mundi nú rætast í dag. SÁ á Raufarhöfn orti þá:
Mikill liggur munur í
maður og Guð að vera.
Annar getur upp á því
hvað ætli hinn að gera.

3.
Theresía Guðmundsson var lengi veðurstofustjóri. Oft sögðu menn: Hvað syngur nú í Theresíu? Ólína Jónasdóttir kvað:
Ennþá lægð við landið er
lítið um sumarhlýju.
Hreint er eins og heyrist mér
hrollur í Theresíu.

4.
Þegar þetta var bjó Ólína Jónasdóttir í litlu koti á Sauðárkróki. Einhverju sinni þurfti hún að fá lagtækan mann til að dytta að húsi sínu. Það er tilefni eftirfarandi vísu:
Mér finnst eitt og annað bresta
á það sem ég frekast kaus.
En eitthvað með því allra versta
er að vera karlmannslaus.

5.
Þorsteinn Ö. Stephensen var á yngri árum og raunar langt fram eftir starfsaldri sínum útvarpsþulur. Þar, er eins og á leiksviði, manna vinsælastur. Það kemur fram í þessari vísu:
Ekki er klukkan orðin sjö
ennþá hefur birtan völdin.
Mikið þrái ég Þorstein Ö
þegar fer að skyggja á kvöldin.
Ókunnur orti:
Dýrðarkarlinn Helgi Hjörvar
hér í lífsins táradal
konur vorar ætíð örvar
eins og líka vera skal.
Jóhann Bárðarson kvað svo um vísur Páls Ólafssonar:
Dýrar veigar mærðarmáls
munu teygast lengi
vængjafleygar vísur Páls
verðfast eiga gengi.
Ólafur í Forsæludal kvað:
Þrautaleiðir þokast fjær
þýða er greið í spori
myndi seiða svona blær
sál til heiða á vori.
Guðríður í Austurhlíð kvað þessa fögru vísu til móður sinnar, Kristínar Guðmundsdóttir þá hún varð áttræð:
Glöð í máli, mild á brá
máttur sálar kyndir
orkubál sem brenna á
beiskju, tál og syndir.
Hæstaréttarlögmaðurinn P.S.P. skrifar og segir: Til Skúla Ben, er Helgarvísur féllu niður 9. apr. 1983, viku fyrir sumarmál:
Vetrar snarpa veðrið dvín
víkur karp úr hugum manna.
Nú er harpan þögnuð þín
þekkti garpur kviðlinganna.
Björn á Löngumýri var um tíma kaupfélagsstjóri á Skagaströnd. Um hann kvað Lúðvík Kemp tvíræða vísu:
Bátnum snýr og beitir vörn
bæði skýr og vitur
Ævintýra-óskabjörn
undir stýri situr.
Árni Jónsson frá Múla var talinn með skemmtilegustu mönnum og hagmæltur vel. Um Jónas frá Hriflu kvað hann:
Ef að Jónas er þér kær
ættirðu hann að kynna.
Hann er orðinn elliær
ofan á það fyrra.
Eitt sinn var Hermann Jónasson forsætisráðherra á ferð um Suðurland í bifreið ásamt fleiri þekktum mönnum þar á meðal Agli í Sigtúnum, sem oft var kallaður harðstjórinn. Þeir voru við skál. Seinfarið var svo kvölda tók og skyggja áður en þeir næðu leiðarenda. Þá dofnaði yfir hinu fríða föruneyti og varð þögn í bílnum. Þá kvað Hermann:
Harðstjórinn er heldur fár
hann er orðinn fullur.
Ég er eftir, aleinn klár
innan um þessar bullur.
Þá lifnuðu félagar Hermanns heldur en ekki við og sögðu að hann færi með lygi, hann væri sjálfur fyllstur. Þá sagði Hermann:
Þetta´ eru ýkjur, því er ver
þetta´ er næstum lygi.
Þetta kom af sjálfu sér
svona á fylliríi.
Helgarvísur
Jón Benediktsson frá Aðalbóli svaraði Höskuldi Einarssyni(Ljúga stela myrða menn):
Þótt þú trúir illu enn
upp á Húnvetninga
finnurðu aldrei meiri menn
meðal Þingeyinga.
Loki Laufeyjarson sem segist vera Húnvetningur sendi þættinum þessa vísu:
Þingeyinga æ og sí
angra mun og þvinga
að aldrei fá þeir fetað í
fótspor Húnvetninga.
Magnús Teitsson
Í morgun ég vaknaði viður
eitt voðalegt timburbrak.
En í dag hef ég drukkið mig niður
í dag er ég fyrirtak.
Helgarvísur 17/7 ´82
Margrét Rögnvaldsdóttir frá Réttarholti í Skagafirði er nú orðin 93 ára. Hún dvelst á Dvalarheimili aldraðra. Til hennar kom nýlega önnur vistkona og kvartaði sáran yfir leiðindum og tilbreytingarleysi. Margrét svaraði:
Göngum vér hér grýttan veg
gegnum markalínu.
Ævin reynist auðnutreg
á elliskeiði sínu.
Skapast sorgir sælu úr
sumar morgna vinur.
Er á torgin skellur skúr
skýjaborgin hrynur.
Margrét Ólafsdóttir yrkir þessa snjöllu vísu í tilefni af vísu RGSn. um Reykjavík(Geng ég einn hin glæstu torg).
Guttormur J Gutt. kvað:
Ég átti ekki stélfrakka í eigu til
en aðeins þelstakk og hettu
að etja við helblakkan hríðarbyl
á heimsins Melrakkasléttu.
Helgarvísur(úr 44. þætti) auglýsa eftir höfundi:
Húnvetningar hafa enn
harðar tekið sennur.
Björn og Skjónu muna menn
meðan Blanda rennur.
Hvísur 41. þáttur
Frétt að norðan segir Skuggi:
Pálmann ber í höndum hátt
Húnvetninga goðinn.
Framsóknar í fjósi brátt
fór að hallast stoðin.

33.
þáttur
Ingibjörg hin húnvetnska sendir þessar stöku:
Hér er mikill djöfladans
drjúgum hækkar vara.
Ekki sér til auðnulands
og enginn kann að spara.
Sig. Þórarinsson hafði sagt um fyrsta Kröflugosið: Þetta er ekki gos, þetta er drullusletta.
Viðbrögð sumra vekja bros
vá þó sé að frétta
„Þetta er ekki þingeyskt gos
þetta er drullusletta.„RR
og
Hýsum amann ekki lengi
óðinn tama kveðum vér
Ljóða saman stillum strengi
stutt því gaman lífið er. RR
Helgarvísur – líkl. allar húnvetnskar:
Grímur Gíslason kvað á ferðalagi:
Bjart er heiðið, blítt þú sérð
brunað skeiðið, lengist saga.
Engum leiðist, löng var ferð.
Lánið greiðist slíka daga.
Indíana Albertsdóttir frá Neðstabæ:
Gistir lengi grönnum hjá
Gróu-fengin saga
en til að hengja hatt sinn á
hefur hún engan snaga.
Þorsteinn Ásgrímsson
Veðrafjandinn frá mér snýr
fjármannsvanda lýkur.
Sunnanandi óskahlýr
yfir landið strýkur.
Kristján Sigurðsson frá Hvammi:
Laðar þráin ljúf og heit
líf í „Aðalstræti“.
Strákarnir í stelpuleik
stíga léttum fæti.
Þormóður Pálsson:
Út á tímans ólguflaum
æskan burtu´ er flotin.
Liggja bak við gamlan glaum
glösin týnd og brotin.
Þórarinn Þorleifsson:
Geðið fangar gamanið
grös í anga haga.
Golan vanga gælir við
góða, langa daga.
Bjarni Jónsson frá Gröf:
Þó að ellin andann slævi
ennþá hef ég dágóð spil.
Lífið vakir alla ævi
yfir því að vera til.
Valdimar K Benónýsson:
Enn í hlóðum eldar braka
ylja þjóðinni. –
Þar á móðurmálið spaka
málm í glóðinni. áður komið á vísnavef/Húnaflói með orðamun
Kveðið við lát Teits Björnssonar á Kringlu. Vísan er af sumum eignuð Þórarni Jónssyni alþm. á Hjaltabakka.
Gröfin dáinn geymir Teit
glöggt oss tjáir saga.
Heimurinn má því hefja leit
hrygg sér fá að naga.
Sr. Guðlaugur Guðmundsson á Stað í Steingrímsfirði dó í Reykjavík 1931. Sagt er að þetta sé síðasta vísa hans:
Frjáls er andinn ferðbúinn.
Förina lítið heftir.
Bráðum sinar, bein og skinn
í bólinu skil ég eftir.
Barði Friðriksson lögfræðingur:
Þegar á vorin vakna strá
og vatnið klýfur sporður
og ilminn finna úr moldu má
mig fer að langa norður.
Einar Sverrisson viðskiptafr. frá Hvammi í Norðurárdal lét þættinum stöku í té sem hann sagði vera eftir Odd A. Sigurjónsson:
Raufarstein er rétt að fá
og rammlega hepsu úr stáli
hengja þetta um hálsinn á
Höllustaða-Páli.
Eftir fund um Blönduvirkjun:
Mörgum verður vegur háll
við svo bar í þetta sinn
ef Höllustaða- hefur Páll
hlaupið af sér þingmanninn. (ók. kannski HJV)
Helgarvísur: Ingibjörg hin húnvetnska hefur bréf sitt á þessum vísum:
Ambögurnar efalaust
oft má Skúli laga.
Nálgast óðum hrímkalt haust
hlýja strengi Braga.
Oft ég hnoða lakan leir
lítt hann tollir saman.
Úr því verður aldrei meir
en ónýtt stundargaman.
Aðalbjörn Úlfarsson frá Vattarnesi v/Reyðarfjörð kvað í tilefni af núverandi raunum Sjálfstæðisflokksins:
Riðlast fylking römm og há
í reiði er Gunnar sokkinn.
Gunnar Thor með glaða brá
gerði klof á flokkinn.
Fara góðir fyrir þjóð
fram er róður gerður.
Landsins móðir, ljúf og góð
leikhússtjóri verður.
Vilhjálmar frá Gauksmýri Hún.
Býsna marga hildi háð
hefur Gunnar kallinn.
Ef að betur að er gáð
er nú Geiri fallinn.
Eftirfarandi vísa er eftir konu í Húnaþingi:
Fyrst mér sá er unni ég ung
ekki reyndist betur
táls á leið, í taumi þung
tek ég þig ekki, Pétur.
Alltaf verður Blanda best
byggðastólpinn traustur.
En sumir veðja á haltan hest
á heiðunum lengst í austur. S.H.
Jón á Akri æ með stakri
elju berst
fyrir okri og eymdarhokri
uns hann ferst. Úr þingmannarímu 1938
100 kosningavísur úr öllum kjördæmum eftir Brand bílstjóra:
V-Hún:
Örlög þeirra eru hörð
sem ýfa Skúla fiður
alla kveður undir jörð
og ennþá lengra niður.
A-Hún
Hér er mikill höfðingi
hvergi risnu sparar
æðstaráð á alþingi
öðrum fram úr skarar.
Ekki dugar Hafsteinn hót
hér er Jóni að mæta.
Brosandi með blíðuhót
býður hann til sæta.
Skag.
Steingrímur og Staðar-Jón
stangast hér af vana.
Það er orðin algeng sjón
og ekkert nýtt við hana.