Áraskipti

Nei, tíminn sýnir okkur enga vægð
og aldrei verður þeirri skipan breytt
að komi þau og fari, eitt og eitt
já, eins og þegar vætuþrungin lægð

leysir aðra af hólmi og með hægð
hverfur út í buskann. Ekki neitt
er um það spurt né um það heldur skeytt
hvort okkur sé í slíku máli þægð.

Því vart mun okkar hagur hætta að þrengjast
þótt hækki sól og dagar taki að lengjast
ef æ hið sama verður hér við völd.

Né munum við af því við tímann tengjast
að tölur skuli látlaust yfir dengjast
og verði skipt um ártal, skipt um öld.