Á Langadalsfjalli

Feta ég fornar slóðir
finn mína gömlu vini.
Fjallsins heiðríki heimur
heilsar í aftanskini.

Hábrýndir Hrafnaklettar
hreykja sér yfir dalnum.
Smáhrun í hengiflugi
hljómar í klettasalnum.

Man ég Gilsdalinn djúpa
og Dýhóla mosa-flæði.
Blámelur nokkru neðar
nemur við gilin bæði.

Vatnadalurinn væni,
verpa þar álftir á bakka.
Í Hraunbrekku hrossin og rjúpan
sig hópa í grösugum slakka.

Efst upp á fjallinu finn ég
fallegar grámosabreiður.
Við Stórhól er stórgrýtis-urðin,
þar steindepill gerir sér hreiður.

Af Brúnum ég lít yfir landið
- liðið er senn að kveldi:
Húnavatn, Hópið og Flóinn
hjúpuð í kveldsólareldi.