Svipsýn

Kvölda tekur á Kaldadal
kveður hin lága sól
refur skimar í austurátt
einmana á gráum hól.

Kulið á dimmum Kaldadal
kyrjar sitt dapra stef.
Andartak þar fyrir augu ber
hinn ókunna fjallaref.

Grafin í sand eru gömul spor
gengin hin lága sól.
Kvöldskugginn leggst yfir Kaldadal
– og hvítur refur á hól.

Refinn hvíta á Kaldadal
við kvöldhimin rauðan ber.
Enginn veit hvaðan kom hann sá
né hvert hann að lokum fer.