Sumardraumur

Ég þrái sólbjartan sumardag
og söngva fuglanna í dalnum heima.
Við fossana hlusta á fallandans lag
sjá fjallalækina hvíslandi streyma.

Þar brosandi sólgeislar berast um dalinn
og blómanna litskrúð þúsundfalda.
Friðurinn einkennir fjallasalinn
falinn í bládjúpi himintjalda.

Heiðgolan frjáls eins og hugur manns
háfjallabúunum svalar.
Fegurðarauðlegð míns ættarlands
óskamál hjartans talar.

Heillandi óma ég heyri á stundum
hljóma sem bergmál frá Íslands dölum.
Þótt skógarnir ilmi með skuggsælum lundum
og skrautið ljómi í glæstum sölum.

Í fjarlægð ég hlusta á það fagnaðarlag
um föðurlandið er mig að dreyma.
Ég þrái sólbjartan sumardag
og söngva fuglanna í dalnum heima.