Kvöld við varðeldinn

Hér er fagur fjallahringur
fjörðurinn er spegilsléttur
uppi gnæfir Urðartindur
allt er kvöldið töfrum prýtt.
Varðeldurinn ljúft hér logar
laðar söngva fram af vörum
nikkan kveikir fótafjörið
á fjörukambi er stiginn dans.

Aldnir jafnt sem ungir gleðjast
ekki spillir gagnsætt húmið
sem í dulargervi geymir
gersemar við Norðurfjörð
Klukkan eitt er bálið brunnið
bara glæður eftir sindra
harmoniku tónar tæmdir
tíminn líður allt of fljótt.

Þá skal haldið heim í tjöldin
höfga næturhvíld að teyga
okkar bíða aðrir dagar
ótal margt í skauti bera.
Minningarnar mætar geymast
mörg þó fyrnist ævisporin
frændaliði færi þakkir
fyrir þessar góðu stundir.