Ég vil lifa

Ég vil öllum gera gagn, gleðja, styrkja og hugga.
Ég vil auka yndismagn, eyða hverjum skugga.
Ég vil stuðla að friði um fold, fagna hreinum ljóðum.
Ég vil sá í móðurmold, mannlífs fræjum góðum.
Ég vil lifa og lífið gera ljúft og hlýtt á allan veg,
eins og lífið á að vera allt – með sporin dásamleg!
Ég vil líta í lengd og bráð lausnar ráðin snjöllu.
Ég vil trúa á tign og dáð, treysta Guði í öllu.
Ég vil kynna kærleiksmál, kveikja ylinn mesta.
Ég vil elska af allri sál, eiga vininn besta.
Ég vil lifa og lífið gera ljúft og hlýtt á allan veg,
eins og lífið á að vera allt – með sporin dásamleg!