Í Bólstaðarhlíð

Ég hefi staðið á grjóteyrinni,
skógurinn að baki
framundan yfirgefin kirkja
áin rennur.
Hér áðum við,
bíllinn varð feginn
að standa kyrr á grasinu
vindurinn fyllti dalinn
einhverri dul
á leið sinni upp á fjöllin.

Heitt kaffi á brúsa
og nokkrar brauðsneiðar
– ég man að okkur fannst
litur appelsínanna
æði glannalegur í mónum.

Hér stóðum við
niðri á eyrinni
og áin rann
og rann
og rann.