Ort á hátíðasamkomu við vígslu Reykjaréttar

Öðrum nýrri er sú frétt
að endurbyggða Skeiðarétt
eftir fjögra ára slag
eigi að vígja á höfuðdag.

Þó að hér sé fátt um féð
fæ ég ekki betur séð
en að mörgum gatan greið
gerist núna upp á Skeið.

Minnast vilja menn í kvöld
mannvirkis sem heila öld
staðið hefur af sé öll
ofviðri og skýjaföll.

Sögu hennar sagt ei get
en sjálfsagt hefur meira ket
dregist inn í dilka þar
en dæmi fást um víðast hvar.

Ósk þá set ég efst á blað
aldrei hljóðni á þessum stað
rollujarm í réttunum
né rifrildið í hundunum.

Þó að búmark bændunum
bjóði að fækka sauðkindum
Skeiðaréttir fjöldi fjár
fylli næstu hundrað ár.