Bjarni Jónsson (Latínu-Bjarni) d. 1790

Bjarni bjó að Knerri í Breiðuvik og voru foreldrar hans Jón Guðmundsson á Knerri og kona hans, Hallný Bjarnadóttir úr Flatey. Bjarni var tvo vetur í Skálholtsskóla, 1730–1732, og segir Páll Eggert Ólason að honum hafi verið vísað þaðan vegna tornæmis. Bjarna er nokkuð getið í þjóðsögum og Gísli Konráðsson fjallar um hann í Sagnaþáttum sínum sem gefnir voru út 1915–1920. Bjarni þótti vita lengra en nef hans náði og var ýmist kallaður Latínu-Bjarni, Bjarni djöflabani eða Bjarni bani. Ýmis kveðskapur er eftir hann í handritum og þar á meðal Hektorsrímur (sjá Lbs 2845 8vo og ÍB 209 4to). Hann er einnig talinn hafa ort Rímur af Friðþjófi frækna en ekki hafa þær fundist. (Heimildir: PEÓl: Íslenzkar æviskrár I, bls. 176–177, og Finnur Sigmundsson: Rímnatal I–II).