Davíð Jónsson (Mála-Davíð) 1768–1839

Davíð var sonur Jóns Jónssonar „lærða“ að Ási í Kelduhverfi og Ingibjargar Grímsdóttur konu hans. Óvíst er hvenær Davíð var fæddur en Páll Eggert Ólason giskar á að það hafi verið 1768. Ekki er heldur vitað hvar hann fæddist né hvar hann ólst upp. Hann varð síðar bóndi á Hofi í Öræfum og svo á Brattlandi á Síðu 1821 til dauðadags 5. janúar 1839.
Hann átti í deilum og málaferlum við Þórð Thorlacius sýslumann og mun hann hafa fengið viðurnefni sitt, Mála-Davíð, vegna þeirra. 
   Til er nokkuð af skáldskap eftir Mála-Davíð og þar á meðal óprentaðar rímur af Illuga Gríðarfóstra. (Heimildir: Íslenzkt skáldatal a–l, bls. 26 og Páll Eggert Ólason: Íslenzkar æviskrár, I bindi, bls. 306).