Brynjólfur Halldórsson d. 1737

Brynjólfur er talinn fæddur um 1676. Hann var að langfeðgatali kominn af síra Einari Sigurðssyni skáldi í Eydölum, sonur síra Halldórs Eiríkssonar á Hjaltastöðum í Útmannasveit og konu hans, Þorbjargar Hallgrímsdóttur. Brynjólfur var prestur í Kirkjubæ í Tungu frá 1709 til dauðadags en hann rotaðist er hann tók út af báti í lendingu 22. ágúst 1737. Brynjólfur orti mikið og eru til eftir hann rímnaflokkar í handritum. Hefur honum meðal annars verið eignuð ein Grobíasrímna, sú af Viðbjóði og Viðurstyggð. (Heimild Páll Eggert Ólason: Íslenzkar æviskrár I, bls. 277–278).