Andvökusýnir

Oft við rökin undarleg
andvaka um njólu
horfði fast um hulinn veg
Hjálmar skáld í Bólu.

Síst með innri augun blind
opið hugarflæði
sá hann frá sér margt í mynd
mannlífs flókna þræði.

Lífs við breiða sálarsýn
sveif hann ofar kjörum
meðan efni bragar brýn
brunnu heit á vörum.

Leit hann margt á leiðum þeim
lét það hugann næra
fékk þar sýn í hulinn heim
handan landamæra.

Þó við kjörin niðurnídd
neyðin vonum eyddi
andleg sjón um æðri vídd
oft hann þannig leiddi.