Kveðja

Renndu, fljúgðu um hafið heim,
heilsaðu löndum öllum,
berðu kæra kveðju þeim:
konum, mönnum, fjöllum.

Kveiktu í hjörtum ljós og líf,
leiðar vertu stjarna,
andans sverð og andans hlíf,
unun landsins barna.

Sýndu landsins sonum gagn,
seið fram dug í þrautum,
framfaranna vona vagn
vertu á nýjum brautum.

Heittu vættir hollar á
hjálp og lið að veita,
svo þú megir sigur fá:
svefni í vöku að breyta.