Kvæða- og vísnasafnið Haraldur

Söfn

Íslenska
Nynorsk
Esperanto

Persónuvernd:

Vefurinn safnar engum upplýsingum um notendur sína. Leturgerðir eru frá Google sem skráir notkun á þeim.
Vefkökur (cookies) eru aðeins notaðar til þess að halda utan um innskráningar þeirra sem annast efnisstjórn.

Í Skíðadal 7. júlí 1977

Fyrsta ljóðlína:Þú heilsar mér dalur með brosið þitt bjarta
Viðm.ártal:≈ 1975
Tímasetning:1977

Skýringar

Úr ljóðaheftinu Hugarflug bóndans í Birkimel, sem kom út í tilefni af 80 ára afmæli höfundar 1996.
Þú heilsar mér dalur með brosið þitt bjarta
björkin og víðirinn laufinu skarta.
Sólroðin skýin að háfjöllum hníga
hugnæmir óðar frá fuglunum stíga.

Ég ann þér af hjarta í hretum sem hlýju
og hjá þér ég ætla að dvelja að nýju.
Syngdu mér óðinn þinn sæta með blænum,
sýndu mér vorið í skrúðanum grænum.

Láttu mig finna að hér á ég heima
og haustfegurð þinni ég aldrei mun gleyma,
það er sem á öndinni andvarinn standi
og ómurinn vatnanna nái ekki að landi.

Á ég að fara, eða á ég að vera,
við unnumst í gleði, en hvað á að gera?
Sendu mér vonina visnuðu mína
vertu mér styrkur, þá mun aftur hlýna.

Það þýðir ei neitt þótt við þykjumst allt geta
við þurfum svo margoft af raunsæi að meta,
aðstæður breytast og allt fer úr lagi
og af þessu verður svo leiðindi og bagi.

Gefðu mér tíma og gættu að fleiru,
það gefur þér umsvif og tildrög að meiru.
Flýttu þér hægt, það er ljósfar í línum,
þú lærir og þroskast af hugsunum þínum.